१४ जून चालू घडामोडी

Daily Current Affairs in Marathi (चालू घडामोडी) |14 June 2023

Daily Current Affairs in Marathi: In this article, we have provided daily current affairs in Marathi. Useful for MPSC Rajyaseva, MPSC Grp B & C, Police, Talathi Bharti, and other competitive exam

RRB NTPC, बँकिंग, पोलीस आणि अन्य भरती परीक्षांमध्ये हे सामान्य ज्ञानावरील प्रश्न विचारले जातात. बहुतांश परीक्षांमध्ये करंट अफेअर्सशी संबंधित प्रश्न विचारले जातात. सामान्य ज्ञान विषयातले हे प्रश्न वर्तमान परिस्थितीशी निगडीत असतात.

अभियांत्रिकी, फार्मसीसह अन्य बावीस अभ्यासक्रमांची प्रवेशप्रक्रिया १५ जूनपासून

सीईटी परीक्षेचा निकाल सोमवारी जाहीर झाल्यानंतर आता पुढील टप्पा म्हणजे पदवी अभ्यासक्रमाचा प्रवेश. अभियांत्रिकी, फार्मसी, कृषी पदवीसाठी या परीक्षेतील गुण महत्त्वाचे ठरतात. त्यानुसार सीईटी सेलकडून बावीस अभ्यासक्रमांच्या प्रवेशासाठी ऑनलाइन नोंदणीच्या तारखा जाहीर करण्यात आल्या आहेत.
एमबीए, एमसीए, विधी हे पाच वर्षीय अभ्यासक्रम, कृषी, अभियांत्रिकी, फार्मसी यासाठी १५ जूनपासून नोंदणी करता येणार आहे. तर हॉटेल मनेजमेंट, नियोजन, बी.टेक, फाईन आर्टस व अन्य अभ्यासक्रमांची नोंदणी १६ जूनपासून सुरू होईल.
केंद्रिभूत प्रवेश प्रक्रिया पद्धतीने पदवी व पदव्युत्तर पदवी अभ्यासक्रमाचे प्रवेश होणार आहेत.

‘NEET’चा निकाल जाहीर; राज्यातील श्रीनिकेत रवी, तनिष्क भगत, रिद्धी वजारींगकर देशातील पहिल्या पन्नासमध्ये

वैद्यकीय पदवी अभ्यासक्रमांच्या प्रवेशासाठी घेण्यात आलेल्या राष्ट्रीय पात्रता प्रवेश परीक्षेचा (नीट-यूजी) निकाल राष्ट्रीय परीक्षा प्राधिकरणाने (एनटीए) बुधवारी मंगळवारी रात्री प्रसिद्ध केला. त्यात ११ लाख ४५ हजार ९७६ विद्यार्थी पात्र ठरले असून राज्यातील १ लाख ३१ हजार ८ विद्यार्थी पात्र ठरले आहेत. ९९.९९ पर्सेंटाइल मिळवलेल्या देशातील पहिल्या पन्नास विद्यार्थ्यांमध्ये राज्यातील श्रीनिकेत रवीने सातवा, तनिष्क भगतने २७वा आणि रिद्धी वजारींगकरने ४४वा क्रमांक मिळवला. गेल्यावर्षीच्या तुलनेत यंदा राज्यातील पात्रताधारक जवळपास पन्नास हजारांनी वाढले आहेत.
एनटीएने प्रसिद्धीपत्रकाद्वारे ही माहिती दिली. यंदा देशभरातील ४ हजार ९७ केंद्रांवर ही परीक्षा घेण्यात आली. २० लाख८७ हजार ४६२ विद्यार्थ्यांनी या परीक्षेसाठी नोंदणी केली होती. प्रत्यक्ष परीक्षा दिलेल्या २० लाख ३८ हजार ५९६ विद्यार्थ्यांपैकी ११ लाख ४५ हजार ९७६ विद्यार्थी पात्र ठरले. तामिळनाडूच्या प्रभंजन जे आणि बोरा वरूण चक्रवर्ती यांनी संयुक्तरित्या देशात पहिला क्रमांक मिळवला. गेल्यावर्षीच्या तुलनेत यंदा नीटसाठीच्या नोंदणीसह पात्र ठरलेल्या विद्यार्थ्यांची संख्या वाढली आहे.
देशात उत्तर प्रदेशातील सर्वाधिक १ लाख ३९ हजार ९६१ विद्यार्थी पात्र ठरले. राज्यातील २ लाख ७७ हजार ९०३ विद्यार्थ्यांनी नोंदणी केली होती. २ लाख ७३ हजार ८१९ विद्यार्थ्यांनी प्रत्यक्ष परीक्षा दिली. त्यापैकी १ लाख ३१ हजार ८ विद्यार्थी पात्र ठरले आहेत. श्रीनिकेत रवीने राज्यात पहिला क्रमांक पटकावला. राज्यातील आर्या पाटील, हादी सोलकर यांनी अपंग प्रवर्गातील, पलक शहाने आर्थिकदृष्ट्या दुर्बल घटक प्रवर्गातील, आयुष रामटेकेने अनुसूचित जाती प्रवर्गातील, शिवम पाटील इतर मागास वर्ग प्रवर्गातील पहिल्या दहा विद्यार्थ्यांमध्ये स्थान मिळवले.

किरकोळ महागाईदराचा दोन वर्षांतील नीचांक, मे महिन्यात ४.२५ टक्क्यांवर

भाजीपाला, तृणधान्य किमती घसरल्यामुळे सरलेल्या मे महिन्यात किरकोळ महागाई दर २५ महिन्यांच्या नीचांकी ४.२५ टक्क्यांवर नोंदवला गेला. महागाई दरात घसरणीचा हा क्रम सलग चौथ्या महिन्यात कायम असून, रिझर्व्ह बँकेसाठी सहनशील मर्यादा पातळी अर्थात सहा टक्क्यांखाली तो नोंदवला जाण्याचा हा सलग तिसरा महिना आहे.
ग्राहक किंमत निर्देशांकांवर आधारित महागाई दर आधीच्या एप्रिल महिन्यात ४.७ टक्के पातळीवर होता, तर गेल्या वर्षी म्हणजे मे २०२२ मध्ये तो ७.०४ टक्के अशा चिंताजनक पातळीवर होता. एप्रिल २०२१ मध्ये नोंदवल्या गेलेल्या ४.२३ टक्क्यांच्या महागाई दरानंतर नोंदवला गेलेला सर्वात कमी दर आहे. यापूर्वी सप्टेंबर २०१९ मध्ये महागाई दर ४ टक्क्यांच्या पातळीखाली नोंदवला गेला होता.
अन्नधान्य घटकाच्या किमती घट झाल्याचा परिणाम मे महिन्याच्या एकंदर महागाई दरातील घसरणीत दिसून आला. एप्रिलमध्ये ३.८४ टक्के नोंदवलेली अन्नधान्यांच्या किमतीतील वाढ ही मे महिन्यात २.९१ टक्क्यांवर घसरली. ग्राहक किंमत निर्देशांकांत जवळपास निम्मा वाटा हा अन्नधान्य घटकाचा आहे. बरोबरीने इंधन आणि विजेच्या महागाईचा दरही एप्रिलमधील ५.५२ टक्क्यांवरून मागील महिन्यात ४.६४ टक्क्यांवर आला.

व्याजदर कपात शक्य?

गेल्या आठवडय़ात रिझर्व्ह बँकेने पतधोरण जाहीर करताना रेपो दर ६.५ टक्क्यांच्या पातळीवर कायम ठेवून चलनवाढीतील ताज्या उताराच्या शाश्वततेबद्दल साशंकता व्यक्त केली. ’महागाईवर ‘अर्जुनासारखा नेम’ रोखून धरणे गरजेचे असल्याचे गव्हर्नर शक्तिकांत दास यांनी म्हटले होते.
’चालू आर्थिक वर्षांसाठी किरकोळ चलनवाढीचा दर सरासरी ५.१ टक्के आणि एप्रिल ते जून तिमाहीत तो ४.६ टक्क्यांवर राहण्याचे मध्यवर्ती बँकेचे अनुमान आहे. प्रत्यक्षात मे महिन्याची आकडेवारी ही या अंदाजाहून अधिक घसरण दर्शविणारी आहे.’एल-निनोच्या परिणामाच्या शक्यता असतानाही यंदा पाऊसपाणी सामान्य राहिल्यास, महागाई दराच्या घसरणीचा क्रम टिकून राहील आणि नजीकच्या काळात व्याजदर कपातही दिसून येईल, असे अर्थतज्ज्ञांचे म्हणणे आहे.

मुंबई, पुण्यासह सात शहरांसाठी केंद्राच्या आपत्ती निवारण योजना; अमित शाहंची घोषणा

केंद्रीय गृहमंत्री अमित शाह यांनी मंगळवारी सर्व राज्यांतील अग्निशमन सेवा आधुनिक करण्यासाठी, सात प्रमुख शहरांमधील पुराचा धोका कमी करण्यासाठी आणि १७ राज्यांतील भूस्खलन रोखण्यासाठी आठ हजार कोटींहून अधिक किमतीच्या तीन मोठय़ा योजना जाहीर केल्या.राज्ये आणि केंद्रशासित प्रदेशांच्या आपत्ती व्यवस्थापन मंत्र्यांच्या बैठकीला संबोधित करताना शाह यांनी देशात कुठेही कुठल्याही आपत्तीत एकही नागरिक मृत्युमुखी पडू नये, यासाठी पावले उचलण्याचे आवाहनही केले.
शहा यांनी सांगितले, की राज्यांमध्ये अग्निशमन सेवेच्या विस्तारासाठी आणि आधुनिकीकरणासाठी पाच हजार कोटी रुपयांची मदत दिली जाईल. मुंबई, पुणे, चेन्नई, कोलकाता, बंगळुरू, हैदराबाद आणि अहमदाबाद या सात सर्वाधिक लोकसंख्येच्या महानगरांतील पुराचा धोका कमी करण्यासाठी अडीच हजार कोटींची तरतूद केली आहे.
भूस्खलन रोखण्यासाठी १७ राज्ये आणि केंद्रशासित प्रदेशांत ८२५ कोटी रुपयांचा ‘राष्ट्रीय भूस्खलन जोखीम प्रतिबंधक प्रकल्प’ सुरू करण्यात येणार आहेत. आपत्तीमुळे एकाही व्यक्तीचा मृत्यू होऊ नये यासाठी आपला प्रयत्न असायला हवा. गेल्या पाच वर्षांत पंतप्रधान मोदींच्या नेतृत्वाखाली सर्व राज्यांनी हे उद्दिष्ट साध्य करण्यासाठी प्रयत्न केले आहेत. ज्या राज्यांत अणुऊर्जा प्रकल्प उभारले जात आहे, तेथे राष्ट्रीय आपत्ती व्यवस्थापन प्राधिकरणाकडून पाहणी दौरे केले गेले आहेत. अशा राज्यांत आपत्तीच्या काळात बचावासाठी करावयाच्या उपायांची विशिष्ट पद्धत कळवण्यात आली आहे.

चालू घडामोडी प्रश्नमंजुषा

दिनविशेष

१४ जून चे दिनविशेष पाहण्यासाठी (येथे क्लिक करा)

अधिक घडामोडी:

Latest Maharashtra Govt. Jobs	Majhi Naukri 2022
Home Page	MPSC Today
Daily Current Affairs in Marathi	Chalu Ghadamodi