Daily Current Affairs in Marathi (चालू घडामोडी) | 2 November 2022
Daily Current Affairs in Marathi: In this article, we have provided daily current affairs in Marathi. Useful for MPSC Rajyaseva, MPSC Grp B & C, Police, Talathi Bharti, and other competitive exam
RRB NTPC, बँकिंग, पोलीस आणि अन्य भरती परीक्षांमध्ये हे सामान्य ज्ञानावरील प्रश्न विचारले जातात. बहुतांश परीक्षांमध्ये करंट अफेअर्सशी संबंधित प्रश्न विचारले जातात. सामान्य ज्ञान विषयातले हे प्रश्न वर्तमान परिस्थितीशी निगडीत असतात.
२ नोव्हेंबर चालू घडामोडी
आदिवासींच्या बलिदानाला स्वातंत्र्योत्तर इतिहासात योग्य स्थान मिळाले नाही -मोदी:
- ‘आदिवासी समाजाशिवाय भारताचा भूतकाळ आणि वर्तमान अपूर्ण आहे आणि देश या समाजाच्या बलिदानाचा ऋणी आहे. दुर्दैवाने आदिवासी समाजाच्या या संघर्षांला व बलिदानाला स्वातंत्र्यानंतरच्या इतिहासात योग्य स्थान मिळाले नाही. मात्र, आता देश ही चूक सुधारत आहे,’’ असे पंतप्रधान नरेंद्र मोदी यांनी मंगळवारी सांगितले.
- राजस्थानातील बांसवाडाजवळील मानगड धाम येथे ‘मानगड धामची गौरवगाथा’ या कार्यक्रमात मोदी बोलत होते.
- मानगड धामच्या विकासासाठी केंद्र सरकार कटिबद्ध असून राजस्थान, गुजरात, मध्य प्रदेश आणि महाराष्ट्रानेही त्याचा विकास आराखडा तयार करून या दिशेने एकत्रित काम केले पाहिजे, असे आवाहन करून मोदी म्हणाले, की आपल्या स्वातंत्र्यलढय़ातील प्रत्येक टप्पा, इतिहासाचे प्रत्येक पान आदिवासींच्या शौर्याने भरलेले आहे. आम्ही आदिवासींच्या बलिदानाबद्दल व त्यांच्या योगदानाबद्दल ऋणी आहोत.
- निसर्गापासून पर्यावरणापर्यंत व संस्कृतीपासून परंपरांपर्यंत या समाजाने भारताचे चारित्र्य जपले आहे. अशा या आदिवासी समाजाची सेवा करून देशाने त्यांचे ऋण फेडण्याची वेळ आली आहे. त्या भावनेने आमचे सरकार आठ वर्षांपासून प्रयत्न करत आहे. मानगड धाम हे आदिवासी वीरांच्या तपाचे, त्याग, तपस्या आणि देशभक्तीचे स्फूर्तिस्थळ आहे. राजस्थान, गुजरात, मध्य प्रदेश आणि महाराष्ट्रातील नागरिकांचा हा समान वारसा आहे.
ट्विटर ‘ब्लू टिक’साठी आता दर महिन्याला मोजावे लागणार पैसे; मस्क यांची घोषणा:
- ट्विटरचे मालकी हक्क मिळताच अब्जाधीश एलॉन मस्क यांनी कंपनीच्या काही नियमांमध्ये बदल केले आहेत. ट्विटरच्या वापरकर्त्यांना अकाऊंट वेरिफाईड करुन ‘ब्लू टिक’ मिळवण्यासाठी आठ डॉलर म्हणजेच अंदाजे ६६१ रुपये प्रती महिना मोजावे लागणार आहेत. ‘ब्लू टिक’ मिळवण्यासंदर्भातील ट्विटरची सध्याची यंत्रणा बकवास असल्याचंही ट्वीट त्यांनी केलं आहे. प्रत्येक देशाच्या खरेदी क्षमतेनुसार या फीमध्ये बदल होईल, असंही त्यांनी जाहीर केलं आहे.
- ट्विटरच्या या ‘ब्लू टिक’ सेवेचे अनेक फायदे असतील, असे मस्क यांनी म्हटले आहे. ”रिप्लाय’, ‘मेन्शन’ आणि ‘सर्च’ या सेवांमध्ये नव्या धोरणानुसार वापरकर्त्यांना प्राधान्य मिळणार आहे. यामुळे स्पॅम आणि स्कॅमपासून वाचण्यास मदत होईल. याशिवाय वापरकर्त्यांना मोठे व्हिडीओ आणि ऑडिओदेखील पोस्ट करता येणार आहेत. अर्ध्यापेक्षा जास्त जाहिरातींपासूनही वापरकर्त्यांची सुटका होईल”, अशी माहिती मस्क यांनी दिली आहे.
- ट्विटरसोबत काम करण्यास उत्सुक असलेल्या प्रकाशकांना ‘पेवॉल बायपास’ मिळेल, असंही त्यांनी स्पष्ट केलं आहे. दरम्यान, कंपनीकडून अक्षरमर्यादेत मोठा बदल केला जाण्याची शक्यता आहे. सध्या ट्विटरवर २८० शब्दांची मर्यादा आहे. ‘कंटेंट मॉडरेशन’ धोरणाचे पुनरावलोकन करण्यासाठी समिती स्थापन करण्याचा निर्णय मस्क यांनी घेतला आहे.
‘एमपीएससी’ उत्तीर्ण होऊनही नियुक्ती नाही ; स्थापत्य अभियांत्रिकीच्या ११४३ उमेदवारांमध्ये संताप:
- स्वप्निल लोणकरच्या आत्महत्येने राज्यभर खळबळ उडाल्यानंतर तत्कालीन सरकारने विद्यार्थीप्रेमी असल्याचा पुळका आणत महाराष्ट्र लोकसेवा आयोगाला (एमपीएससी) बळकट करण्याचे आश्वासन दिले होते. मात्र, स्थापत्य अभियांत्रिकी सेवा परीक्षा २०१९ मध्ये निवड झालेले, कागदपत्र पडताळणी, चारित्र व वैद्यकीय पडताळणी झालेले ११४३ उमेदवार शासनाच्या आडमुठय़ा धोरणामुळे अद्यापही नियुक्तीपासून वंचित आहेत. निवडीच्या चार महिन्यानंतरही सरकार नियुक्ती देत नसल्याने उमेदवारांमध्ये संताप आहे.
- लोणकर आत्महत्येचे पडसाद विधिमंडळातही उमटले. यानंतर माजी उपमुख्यमंत्री अजित पवार यांनी विधानसभेमध्ये ‘एमपीएससी’ला बळकट करत वेळेत परीक्षा व निकाल देण्याचे आश्वासन दिले होते. मात्र, ‘पुढे पाठ मागे सपाट’ या म्हणीप्रमाणे कुठलीही घोषणा पूर्ण झाली नाही. नव्या सरकारनेही ‘एमपीएससी’ उत्तीर्णाकडे दुर्लक्षच केल्याचे चित्र आहे.
- स्थापत्य अभियांत्रिकी सेवेच्या मुलाखती रखडल्यामुळे स्वप्निलने कंटाळून आत्महत्या केली होती. त्यानंतर ‘एमपीएससी’ने मुलाखती घेतल्या. मात्र, याच स्थापत्य अभियांत्रिकीचा मुलाखतीनंतर निकाल जाहीर होऊनही ११४३ उमेदवारांनी कागदपत्र पडताळणी, वैद्यकीय तपासणी आदी सर्व प्रक्रिया पूर्ण करूनही उमेदवार आजही नियुक्तीच्या प्रतीक्षेत आहेत.
- ‘एमपीएससी’ने मुलाखती घेऊन निकाल जाहीर केला असला तरी राज्य सरकार उत्तीर्ण उमेदवारांना वेळेत नियुक्तीच देणार नसेल तर या निकालाचा अर्थ काय? असा सवाल आता उमेदवार उपस्थित करीत आहेत. याविरोधात आता या ११४३ विद्यार्थ्यांनी शासनाविरोधात दंड थोपटले असून मुंबईच्या आझाद मैदानावर साखळी उपोषण सुरू आहे.
हायलो खुली बॅडिमटन स्पर्धा – लक्ष्य सेनचा पहिल्याच फेरीत पराभव:
- भारताचा आघाडीचा बॅडिमटनपटू लक्ष्य सेनला हायलो खुल्या बॅडिमटन स्पर्धेत पहिल्याच फेरीत पराभवाचा सामना करावा लागला. हाँग काँगच्या एन्ग का लोंग अँगसने लक्ष्यला १२-२१, ५-२१ असे पराभूत केले.
- भारताच्या २१ वर्षीय लक्ष्यला अवघ्या २७ मिनिटांत पराभवाचा सामना करावा लागला. यंदाच्या हंगामातील लक्ष्यची ही सर्वात खराब कामगिरी ठरली. पहिल्या गेमच्या २-२ अशा बरोबरीनंतर अँगसने लक्ष्यला संधीच मिळू दिली नाही. पहिल्या गेममध्ये लक्ष्य पुढे १२ गुणांपर्यंत तरी मजल मारू शकला. मात्र, दुसऱ्या गेमला लक्ष्यला पाचच गुणांची मजल मारता आली. सलग नऊ गुणांची कमाई करताना अँगसने विजयावर शिक्कामोर्तब केले.
- मिश्र दुहेरीत ईशान भटनागर आणि तनिशा क्रॅस्टो यांनाही पहिल्या फेरीतच पराभवाचा सामना करावा लागला. चीनच्या फेंग यान झे-हुआंग डोंग पिंग जोडीने भारताच्या ईशान-तनिशाचा २१-१३, २१-१२ असा पराभव केला.
- किदाम्बी श्रीकांत, समीर वर्मा, एच. एस. प्रणॉय, सायना नेहवाल, मालविका बनसोड, फ्रेंच खुल्या स्पर्धेतील दुहेरीचे विजेते सात्विकसाईराज रंकीरेड्डी-चिराग शेट्टी यांनीही या स्पर्धेत सहभाग घेतला आहे.
_
चालू घडामोडी प्रश्नमंजुषा
_
दिनविशेष
२ नोव्हेंबर चे दिनविशेष पाहण्यासाठी (येथे क्लिक करा)
अधिक घडामोडी:
- १ नोव्हेंबर २०२२ चालू घडामोडी
- ३१ ऑक्टोबर २०२२ चालू घडामोडी
- ३० ऑक्टोबर २०२२ चालू घडामोडी
- २९ ऑक्टोबर २०२२ चालू घडामोडी
- २८ ऑक्टोबर २०२२ चालू घडामोडी
Latest Maharashtra Govt. Jobs | Majhi Naukri 2022 |
Home Page | MPSC Today |
Daily Current Affairs in Marathi | Chalu Ghadamodi |