२३ जुलै चालू घडामोडी

Daily Current Affairs in Marathi (चालू घडामोडी) |23 July 2023

Daily Current Affairs in Marathi: In this article, we have provided daily current affairs in Marathi. Useful for MPSC Rajyaseva, MPSC Grp B & C, Police, Talathi Bharti, and other competitive exam

RRB NTPC, बँकिंग, पोलीस आणि अन्य भरती परीक्षांमध्ये हे सामान्य ज्ञानावरील प्रश्न विचारले जातात. बहुतांश परीक्षांमध्ये करंट अफेअर्सशी संबंधित प्रश्न विचारले जातात. सामान्य ज्ञान विषयातले हे प्रश्न वर्तमान परिस्थितीशी निगडीत असतात.

स्टंपवर बॅट फेकून मारणे कर्णधार हरमनप्रीत कौरला पडले महागात, आयसीसीने ठोठावला ‘हा’ दंड

भारतीय महिला क्रिकेट संघाची कर्णधार हरमनप्रीत कौर हिला गैरवर्तन केल्याप्रकरणी दंड ठोठावण्यात आला आहे. स्टंपवर बॅट फेकून मारणे कर्णधार हरमनप्रीत कौरला चांगलेच महागात पडले आहे. अंपायरशी हुज्जत घातल्याप्रकरणी तिला आयसीसीने सक्त ताकीदही दिली आहे. आयसीसीचा नियम काय सांगतो ते, जाणून घ्या.
हरमनप्रीत कौरच्या बाबतीत दिलेला पायचीतचा निर्णय हा वादाचा विषय ठरला आहे. भारताच्या बांगलादेश दौऱ्यातील शेवटचा एकदिवसीय सामना खूप वादग्रस्त ठरला. फलंदाजीदरम्यान बाद झाल्यावर हरमनप्रीत कौर भडकली. अंपायरच्या चुकीच्या निर्णयावर संताप व्यक्त केला. त्यानंतर तिने सामन्याच्या शेवटी प्रेझेंटेशन दरम्यान वादग्रस्त विधानही केले. त्यानंतर आयसीसीने तिला दंड ठोठावला आहे. हरमनप्रीत कौरला तिच्या मॅच फीच्या ७५ टक्के दंड भरावा लागेल. यासोबतच दोन गुणही कापले जातील.
भारतीय महिला क्रिकेट संघ बांगलादेश दरम्यानच्या शेवटच्या एकदिवसीय सामन्यात विजयी होऊ शकला नाही, दोन्ही संघात सामना टाय झाला. भारतीय महिला संघाला एकदिवसीय मालिका जिंकण्यात अपयश आले. शेवटच्या एकदिवसीय सामन्यात कर्णधार हमरनप्रीत कौर नाराज झाली होती. अंपायरने आऊट दिल्यानंतर हरमनप्रीतने बॅट स्टंपला आदळली. त्याचवेळी, सामना संपल्यानंतर तिने प्रेझेंटेशन दरम्यान एक विधानही केले की, “पुढच्या वेळी बांगलादेशला येण्यापूर्वी संघालाही अशा अंपायरिंगला सामोरे जावे लागेल हे आम्ही लक्षात ठेवू आणि त्याची मानसिक तयारी करू.”

कौटुंबिक हिंसाचारात पुणे पहिल्या स्थानावर; मुंबईचा क्रमांक दुसरा

राज्यात कौटुंबिक हिंसाचाराच्या घटनांमध्ये दिवसेंदिवस वाढ होत असून सर्वाधिक कौटुंबिक हिंसाचार सुसंस्कृत शहर म्हणून ओळखल्या जाणाऱ्या पुण्यात होत असल्याचे समोर आले आहे. दुसऱ्या स्थानावर मुंबई आहे. नागपूर तिसऱ्या स्थानावर आहे. महाराष्ट्र पोलिसांच्या संकेतस्थळावर ही आकडेवारी प्रसिद्ध झाली आहे.
पुणे शहरात गेल्या सहा महिन्यांत कौटुंबिक हिंसाचाराच्या २९६ घटना घडल्या. मुंबईत २७६, तर नागपुरात २६० गुन्हे दाखल झाले. या तीन शहरांच्या तुलनेत अन्य शहरांत कमी गुन्हे दाखल आहेत. कुटुंब समुपदेशन केंद्र किंवा भरोसा सेलच्या माध्यमातून कौटुंबिक वाद सोडविण्याचा प्रयत्न केला जात आहे. पतीचे मद्यप्राशन, अनैतिक संबंधांबाबत संशय, सासू-सासऱ्यांची देखभाल किंवा संसारात जास्त हस्तक्षेप, वैयक्तिक स्वातंत्र्य न मिळणे, अशी काही कारणे या गुन्ह्यांमागे आहेत.

शहर गुन्ह्यांची संख्या

२९६ पुणे
२७६ मुंबई
२६० नागपूर

पाकिस्तानचे अर्थमंत्री होणार हंगामी पंतप्रधान?

पाकिस्तानच्या हंगामी पंतप्रधानपदासाठी सत्ताधारी पाकिस्तान मुस्लीम लीग (नवाज गट) सध्याचे अर्थमंत्री इशाक दार यांच्या नावाचा प्रस्ताव ठेवण्याचा विचार करत असल्याचे वृत्त पाकिस्तानमधील माध्यमांनी रविवारी दिले.
मात्र, यासंबंधीचा अंतिम निर्णय आघाडी सरकारमधील अन्य पक्ष असलेल्या पाकिस्तान पीपल्स पार्टीशी सल्लामसलत केल्यानंतरच घेतला जाईल.
शाहबाज शरीफ सरकार पाकिस्तानचा निवडणूक कायदा, २०१७ यामध्ये बदल करण्याचा विचार करत आहे. त्यानुसार हंगामी सरकारला घटनात्मक अधिकारांच्या मर्यादेपलीकडे निर्णय घेता येतील.

चार्ली चॅप्लिन यांची मुलगी जोसेफिनचं निधन, वयाच्या ७४ व्या वर्षी घेतला अखेरचा श्वास

आपल्या विनोदाची भुरळ सगळ्या जगावर पाडणारे महान कलावंत म्हणजे चार्ली चॅप्लिन. आपण चार्ली यांचं नाव घेतलं तरीही आपल्या चेहऱ्यावर हास्य फुलतं. अत्यंत हलाखीत बालपण काढलेला आणि परिस्थितीचे चटके न चुकलेला हा माणूस पडद्यावर यायचा तेव्हा फक्त आनंद फुलवायचा. याच चार्ली चॅप्लिन यांच्या मुलीचं जोसेफिनच चॅप्लीन यांचं निधन झालं आहे. जोसेफिन चॅप्लिन ही हॉलिवूड अभिनेत्रीही होती.
अमेरिकेतल्या एका वृत्तपत्राने दिलेल्या वृत्तानुसार जोसेफिन चॅप्लिन यांचा मृत्यू १३ जुलै रोजी पॅरीस या ठिकाणी झाला. त्यांच्या कुटुंबातर्फे तशी माहिती देण्यात आली. जोसेफिन चॅप्लिन यांचा जन्म २८ मार्च १९४९ रोजी सांता मोनिका, कॅलिफोर्निया या ठिकाणी झाला. जोसेफिन चॅप्लिन या चार्ली चॅप्लिन यांचं तिसरं अपत्य होत्या. जोसेफिनने चार्ली चॅप्लिन यांच्यासह म्हणजेच आपल्या वडिलांसह १९५२ ला आलेल्या सिनेमात काम केलं होतं. ‘लाइमलाइट’ असं या सिनेमाचं नाव होतं. त्यावेळी जोसेफिन यांचं वय अवघं तीन वर्षे होतं. जोसेफिन यांनीही मोठेपणी सिनेमात अभिनेत्री म्हणून काम करणं हेच करिअर निवडलं.
जोसेफिन चॅप्लिन यांच्या निधनानंतर त्यांच्या मागे त्यांची तीन मुलं आणि भावंडं असा परिवार आहे. जोसेफिन यांच्या तीन मुलांची नावं चार्ली, ऑर्थर, ज्युलियन रोनेट अशी आहेत. तसंच जोसेफिन यांची भावंडं मायकल, गेराल्डिन, व्हिक्टोरिया जेन, युजीन आणि ख्रिस्तोफर यांनीही जोसेफिन यांच्या निधनानंतर शोक व्यक्त केला आहे.
जोसेफिन चॅप्लिन यांनी हॉलिवूडच्या अनेक चित्रपटांमध्ये काम केलं आहे. ‘द कँटरबरी टेल्स’ हा त्यांचा सिनेमा हिट ठरला होता. ‘द बे बॉय’ हा सिनेमाही चर्चेत होता. त्यानंतर टेलिव्हिजनची मिनी सीरिज हेमिंग्वे यामध्येही जोसेफिन यांनी काम केलं होतं.

चिराग-सात्विक जोडीने पटकावले विजेतेपद, अंतिम सामन्यात जागतिक क्रमवारीतील अव्वल जोडीचा केला पराभव

सात्विक साईराज आणि चिराग शेट्टी या भारतीय पुरुष जोडीने बीडब्ल्यूएफ ५०० टूर्नामेंट कोरिया ओपनचे विजेतेपद पटकावले. त्यांनी इंडोनेशियाच्या फजर अॅलन आणि मोहम्मद रियान या जगातील नंबर वन जोडीचा पराभव केला. हा सामना ६२ मिनिटे चालला, ज्यात १७-२१, २१-१३, २१-१४ असा भारतीय पुरुष जोडीने विजय मिळवला. या सामन्यापूर्वी इंडोनेशियन जोडीविरुद्धचा विक्रम २-२ असा बरोबरीत होता.
सात्विक-चिराग जोडीने सलग दुसरे विजेतेपद पटकावले –
सात्विक आणि चिराग यांनी यावर्षी इंडोनेशिया सुपर १००० आणि स्विस ओपन सुपर ५०० विजेतेपद पटकावले आहेत. जूनमध्ये इंडोनेशिया ओपन ही शेवटची स्पर्धा जिंकल्यानंतर भारतीय जोडीचे हे सलग दुसरे विजेतेपद आहे. त्याच वेळी, हे त्यांचे तिसरे बीडबल्यएफ ५०० विजेतेपद आहे. यापूर्वी त्यांनी २०१९ मध्ये थायलंड ओपन आणि गेल्या वर्षी इंडिया ओपन जिंकली होती.
सात्विक आणि चिराग यांनी त्यांची जोडी बनल्यापासून अनेक विजेतेपदे जिंकली आहेत. ज्यात राष्ट्रकुल क्रीडा स्पर्धेत सुवर्णपदक, थॉमस चषक सुवर्णपदक, जागतिक स्पर्धेत कांस्य पदक तसेच सुपर ३०० (सय्यद मोदी आणि स्विस ओपन), सुपर ५०० (थायलंड आणि इंडिया ओपन), सुपर ७५० (फ्रेंच ओपन) आणि इंडोनेशिया ओपन सुपर १००० यांचा समावेश आहे.

चालू घडामोडी प्रश्नमंजुषा

दिनविशेष

२३ जुलै चे दिनविशेष पाहण्यासाठी (येथे क्लिक करा)

अधिक घडामोडी:

Latest Maharashtra Govt. Jobs	Majhi Naukri 2022
Home Page	MPSC Today
Daily Current Affairs in Marathi	Chalu Ghadamodi