९ फेब्रुवारी चालू घडामोडी

Daily Current Affairs in Marathi (चालू घडामोडी) |9 February 2024

Daily Current Affairs in Marathi: In this article, we have provided daily current affairs in Marathi. Useful for MPSC Rajyaseva, MPSC Grp B & C, Police, Talathi Bharti, and other competitive exam

RRB NTPC, बँकिंग, पोलीस आणि अन्य भरती परीक्षांमध्ये हे सामान्य ज्ञानावरील प्रश्न विचारले जातात. बहुतांश परीक्षांमध्ये करंट अफेअर्सशी संबंधित प्रश्न विचारले जातात. सामान्य ज्ञान विषयातले हे प्रश्न वर्तमान परिस्थितीशी निगडीत असतात.

शिक्षक भरतीमध्ये तांत्रिक अडचणी, पसंतीक्रम नोंदवण्यासाठी मुदतवाढ

राज्यात सुरू असलेल्या शिक्षक भरती प्रक्रियेतील जागांसाठी पवित्र संकेतस्थळाद्वारे उमेदवारांचे पसंतीक्रम नोंदवण्यात येत आहेत. मात्र या संकेतस्थळाला तांत्रिक अडचणी येत असल्याची तक्रार उमेदवारांकडून करण्यात येत आहे. दरम्यान संकेतस्थळाला येत असलेल्या तांत्रिक अडचणींमुळे पसंतीक्रम नोंदवण्यासाठी १२ फेब्रुवारीपर्यंत मुदतवाढ देण्याचा निर्णय शिक्षण विभागाने घेतला.
राज्यातील हजारो उमेदवारांचे शिक्षक भरतीकडे लक्ष लागले आहे. या भरती प्रक्रियेत नुकतीच एकूण २१ हजार ६७८ पदांसाठीच्या जाहिराती प्रसिद्ध करण्यात आल्या. पवित्र संकेतस्थळावर जाहिरातीची प्रक्रिया पूर्ण केल्यानंतर ३४ जिल्हा परिषदांतील १२ हजार ५२२ पदे, १८ महापालिकांतील दोन हजार ९५१ पदे, नगरपालिकांतील ४७७, नगर परिषदांतील एक हजार १२३, खासगी अनुदानित पाच हजार ७२८ जागांची जाहिरात प्रसिद्ध करण्यात आली आहे. त्यात मुलाखतीशिवाय १६ हजार ७९९ जागांवर, तर मुलाखतीसह चार हजार ८७९ जागांवर भरती केली जाणार आहे. उमेदवारांना पसंतीक्रम नमूद करण्यासाठी ९ फेब्रुवारीपर्यंतची मुदत देण्यात आली आहे. पदभरतीसाठी उमेदवारांची पसंतीक्रमाची कार्यवाही पूर्ण झाल्यानंतर गुणवत्तायादी प्रसिद्ध केली जाणार आहे.
संकेतस्थळाला येत असलेल्या अडचणींबाबत डीटीएड, बीएड स्टुडंट्स असोसिएशनचे संतोष मगर म्हणाले, की संकेतस्थळाला अडचणी येत आहेत. अनेकदा ‘एरर’ दाखवली जात आहे. त्यामुळे पसंतीक्रम नोंदवताना उमेदवार गोंधळून गेले आहेत. या अडचणींच्या पार्श्वभूमीवर शिक्षण विभागाने मदत केंद्र सुरू करावे, तसेच अर्ज भरण्यासाठी मुदतवाढ द्यावी.
२ लाख १७ हजार अभियोग्यताधारकांपैकी जवळपास १ लाख १८ हजार अभियोग्यताधारकांनी गेल्या दोन दिवसांत पसंतीक्रम नमूद केले आहेत. एकावेळी जवळपास ७५ हजार वापरकर्त्यांचे लॉगिन होत असल्यामुळे संकेतस्थळ काही प्रमाणात संथ होत आहे. सर्वांना पसंतीक्रम नोंदवता येण्यासाठी अधिक वेळ मिळण्याच्या दृष्टीने १२ फेब्रुवारीपर्यंत मुदतवाढ देण्यात येत आहे.

मनमोहन सिंग खासदारांसाठी प्रेरणास्रोत; पंतप्रधान मोदींचे प्रशंसोद्गार, राज्यसभेतील निवृत्त सदस्यांना निरोप

माजी पंतप्रधान मनमोहन सिंग यांच्या योगदानाबद्दल विद्यमान पंतप्रधान नरेंद्र मोदी यांचे गुरुवारी राज्यसभेत कौतुक केले. मनमोहन सिंग हे खासदारांसाठी नेहमीच प्रेरणास्रोत असल्याची प्रशंसा मोदींनी केली.
राज्यसभेतील सदस्यत्वाचा मनमोहन सिंग यांचा कार्यकाळ संपुष्टात येत असून त्यांच्यासह अन्य निवृत्त होणाऱ्या सदस्यांना गुरुवारी सदनाने निरोप दिला. त्यावेळी वरिष्ठ सभागृहात मोदींनी तत्कालीन पंतप्रधानांबद्दल गौरवोद्गार काढले. ते दीर्घायुषी व्हावेत आणि आम्हाला मार्गदर्शन करत राहावेत अशी मी प्रार्थना करतो, असे मोदी म्हणाले.
दिल्ली सरकारच्या अखत्यारितील प्रशासकीय अधिकाऱ्यांच्या बदल्यांचे अधिकार काढून घेणारे विधेयक गेल्या ऑगस्टमध्ये केंद्र सरकारने संसदेत मांडले होते. लोकसभेत सत्ताधाऱ्यांकडे बहुमत असल्याने तिथे विधेयेक संमत होणारच होते. पण, राज्यसभेतही केंद्र सरकारने या विधेयकासाठी पुरेसे संख्याबळ उभे केले होते. त्याचा संदर्भ देत मोदी म्हणाले की, या विधेयकावर मतदान करण्यासाठी मनमोहन सिंग व्हीलचेअरवर बसून सभागृहात आले होते. राष्ट्रपतीपदाच्या निवडणुकीसाठीही ते व्हिलचेअरवर बसून आले होते. त्यातून त्यांची लोकशाहीवरील निष्ठा दिसते.
दिल्लीच्या विधेयकावेळी राज्यसभेतही सत्ताधारी आघाडीचा विजय होणार हे निश्चित असतानाही मनमोहन सिंग मतदानासाठी आले होते. वरिष्ठ सभागृहाचा सदस्य म्हणून त्यांनी कर्तव्य बजावले होते. त्यांची लोकप्रतिनिधी म्हणून असलेली कर्तव्यदक्षता वाखाणण्याजोगी आहे, असे मोदी म्हणाले. नेता म्हणून मनमोहन सिंग यांचे योगदान मोठे आहे. वैचारिक मतभेद असू शकतात पण, त्यांनी प्रदीर्घ काळ या सभागृहाला तसेच, देशाला मार्गदर्शन केले आहे. प्रत्येक वेळी झालेल्या चर्चामधील त्यांचे योगदान स्मरणात राहील, असेही मोदी म्हणाले.

पाकिस्तानात मतमोजणी सुरू; मतदानादरम्यान मोबाइल आणि इंटरनेट सेवा बंद, तुरळक हिंसाचार

तुरुंगात असलेले माजी पंतप्रधान इम्रान खान यांच्या पक्षावर कारवाई, मतदान हेराफेरीचे आरोप आणि तुरळक हिंसाचार यामुळे वादग्रस्त झालेल्या निवडणुकीसाठी गुरुवारी झालेल्या मतदानानंतर पाकिस्तानमध्ये मतमोजणी सुरू झाली. संशयित दहशतवादी हल्ले अयशस्वी करण्यासाठी सरकारने मोबाइल आणि इंटरनेट सेवा बंद केल्यानंतर संपर्क समस्या निर्माण झाली होती.
पाकिस्तानात आज सकाळी ८ वाजता मतदान सुरू झाले आणि संध्याकाळी ५ वाजेपर्यंत कोणत्याही विरामाशिवाय सुरू राहिले. १२ कोटींहून अधिक मतदारांना मतदान करता यावे यासाठी देशभरात सार्वजनिक सुट्टी जाहीर करण्यात आली होती. मतदानाची वेळ संपल्यानंतरही मतदान केंद्राच्या आवारात उपस्थित असलेल्या लोकांना मतदान करण्याची मुभा देण्यात आली. मतदानाची टक्केवारी अद्याप कळू शकलेली नाही.
देशभरातून मतदान केंद्रांचे निकाल लागण्यास सुरुवात झाली आहे. परंतु कोणत्याही मतदारसंघाचा संपूर्ण निकाल जाहीरा झालेला नाही.एकूण ३३६ पैकी २६६ नॅशनल असेंब्लीच्या जागांसाठी निवडणूक होती. सरकार स्थापन करण्यासाठी कोणत्याही पक्षाला १३३ जागा जिंकणे आवश्यक आहे.

भारत-म्यानमार सीमेवरील सुरक्षेसाठी केंद्राचा आणखी एक महत्त्वाचा निर्णय, १९७० सालचा ‘हा’ करार केला रद्द

देशाच्या सुरक्षेच्या दृष्टीने भारत सरकारने काही दिवसांपूर्वी मोठा निर्णय घेतला. त्यानुसार, भारत-म्यानमारच्या सीमेवर तब्बल १६४३ किमीचं कुंपण घालण्यात येणार आहे. आता त्याही पुढे जाऊन सरकारने आणखी एक निर्णय घेतला आहे. त्यानुसार, फ्री मुव्हमेंट रिजीम (Free Movement Rigime) अर्थात ‘मुक्त संचार व्यवस्था’ करार रद्द करण्याचा निर्णय घेण्यात आला आहे.
अमित शाहांनी यासंदर्भातील एक्सवर माहिती दिली. ते म्हणाले, देशाची अंतर्गत सुरक्षा सुनिश्चित करण्यासाठी आणि म्यानमारच्या सीमेला लागून असलेल्या भारताच्या ईशान्येकडील राज्यांची लोकसंख्याशास्त्रीय संरचना राखण्यासाठी भारत आणि म्यानमारमधील फ्री मूव्हमेंट रेजिम (FMR) रद्द करण्याचा निर्णय गृह मंत्रालयाने (MHA) घेतला आहे. परराष्ट्र मंत्रालय सध्या ते रद्द करण्याच्या प्रक्रियेत असल्याने, MHA ने FMR तात्काळ निलंबित करण्याची शिफारस केली आहे.
काय आहे FMR?
भारत आणि म्यानमारदरम्यान १,६४३ किमींची सीमा असून या सीमेवर मिझोराम, मणिपूर, नागालँड आणि अरुणाचल प्रदेश हे चार राज्य आहेत. दोन्ही देशांनी १९७० साली मुक्त संचार व्यवस्थेचा (FMR) करार मान्य केला. यामुळे सीमाभागातील आदिवासी जमातींना दोन्ही देशांमध्ये १६ किमीपर्यंत व्हिसाशिवाय मुक्तपणे प्रवास करण्याची मुभा देण्यात आली. परंतु, हा करार आता रद्द करण्यात आला आहे.
म्यानमारमध्ये बंडखोर गट आणि लष्करात संघर्ष सुरू आहे. तसंच, नोव्हेंबर महिन्यात भारतात जवळपास ६०० लष्कर घुसले होते. याप्रकरणी मिझोराम सरकारने केंद्र सरकारकडे मदत मागितली होती. तसंच, सप्टेंबर महिन्यात मणिपूरच्या मुख्यमंत्र्यांनी गृह मंत्रालयाला अवैध घुसखोरी रोखण्यासाठी एफएमआर प्रणाली रद्द कारवी, अशी शिफारस केली होती. म्यानमारच्या सीमेवर कुंपण घालण्याच्या कामाला गती देण्यात येत आहे असंही त्यांनी म्हटलं होतं. मणिपूरची म्यानमारशी ३९० किमी लांबीची सीमा आहे. यापैकी केवळ १० किमीच्या कुंफणाचे काम पूर्ण झाले आहे.

कोहली पुढील दोन कसोटी सामन्यांनाही मुकणार?

भारताचा तारांकित फलंदाज विराट कोहली वैयक्तिक कारणास्तव इंग्लंडविरुद्धच्या तिसऱ्या आणि चौथ्या कसोटी सामन्याला मुकण्याची शक्यता आहे. तसेच अखेरच्या कसोटी सामन्यासाठी त्याच्या उपलब्धतेबाबतही साशंकता आहे, असे भारतीय क्रिकेट नियामक मंडळातील (बीसीसीआय) सूत्रांकडून बुधवारी सांगण्यात आले.
भारत आणि इंग्लंड यांच्यातील पाच सामन्यांची कसोटी मालिका सध्या १-१ अशी बरोबरीत आहे. या मालिकेचा तिसरा सामना राजकोट येथे १५ ते १९ फेब्रुवारी या कालावधीत, तर चौथा सामना रांची येथे २३ ते २७ फेब्रुवारी या कालावधीत खेळवला जाणार आहे. वैयक्तिक कारणास्तव कोहली पहिल्या दोन कसोटी सामन्यांनाही मुकला होता. कोहलीचा जवळचा मित्र आणि दक्षिण आफ्रिकेचा माजी कर्णधार एबी डिव्हिलियर्सने नुकतेच आपल्या यूट्युब चॅनलवर कोहली आपल्या दुसऱ्या पाल्याच्या प्रतिक्षेत असल्याचे म्हटले होते.
‘‘क्रिकेटपटूंच्या कुटुंबाचा प्रश्न असतो, तेव्हा ‘बीसीसीआय’ ठामपणे त्यांच्या पाठीशी उभे असते. आता भारतीय संघात पुनरागमन कधी करायचे याबाबतचा निर्णय कोहलीच घेईल. सध्या तरी, तो या मालिकेत खेळेल असे वाटत नाही,’’ असे ‘बीसीसीआय’च्या सूत्रांकडून सांगण्यात आले.
केएल राहुलही दुसऱ्या कसोटीला मुकला होता. परंतु तिसऱ्या कसोटीत त्याचे पुनरागमन अपेक्षित आहे. राहुल संघात परतल्यास रजत पाटीदार आणि श्रेयस अय्यर यांच्यापैकी कोणाला वगळले जाणार, हे पाहणे महत्त्वाचे ठरणार आहे.

चालू घडामोडी प्रश्नमंजुषा

दिनविशेष

९ फेब्रुवारी चे दिनविशेष पाहण्यासाठी (येथे क्लिक करा)

अधिक घडामोडी:

Latest Maharashtra Govt. Jobs	Majhi Naukri 2022
Home Page	MPSC Today
Daily Current Affairs in Marathi	Chalu Ghadamodi